Khrihfabu Ah Upa Hruaitu Asi Mi Le Pathian Rian A Tuanmi Na Si Ahcun Theih Awk A Tlak Tiah Ka Hmuhmi Tlawmpal Te

1.Nangmah nakin na rian kha a biapi ah na chiah lai.

 

2.Aho rian dah ka tuan ti i fiang cikcek.

3.Thil na theih lomi cu raltha tein ka thei loh a ti ngammi si ko, a thei bantuk in um a herh lo.

4.Na riantuan hawi ngiat, tlattlai hmang hlah.

5.A hleice in tangka, chawva ah siseh, nungak & tlangval ( sex )lei ah i ralring, voikhat mualpho sual ahcun a hmape fawi le bai in a lo kho ti lo.

 6.Pathian rian kha pawchawnnak ah ti sual hlah, nifate na khim tawkte in Pathian nih ei ding an pek ko lai.

7.Rian na tuannak church ah maw? nan buu member mipi, pumpak in theih khawh i zuam hna.

8.a umning cu mipi ca le mipi sinah rian ka tuan ti i thei law na nuncan ziaza, thut dir ah i ralring, zuk, mom a ti mi na si zongah biakinn chungah cun ken lo ti lo i zuam, zeicatiah cun mipi a hruaitu na si hlei ah mipi nih zulhmi na si caah asi.

9.Na ka in na chimmi kha na nun ah hmuh an duh lai ti zong kha philh hlah.

10.Na ka lawng kha riantuannak ah hmang hlah law, na takpum na nuntu khan si deuh seh.

11.Na rian tuannak ah ei le din nak siseh thil dang zongah na or le na ka a sum kho mi va si.

12.A rian na tuanpiakmi Pathian tello cun pakpalawng men ka si, zeihmanh ka si lo ti kha philh hlah.

13.Nangmah nih tha zaang na chuahmi nakin, Pathian nih na caah a peknak le a thil ti khawhnak tu kha i bochan deuh.

14.I ti sang tuk hlah, i toidor deuh toidor cu Pathian nih a duhmi asi.

15.Rian tuan tu ka si ti naa theih ahcun Bawipa sal menmen ka si ti kha philh hlah law, a herh lonak ah na nawlngeihnak kha hmangtuk hlah.

16.Lih le hrawkhrawl chim bak hlah.

17.phorhlawtnak ka pongte ah a um peng ti zong philh fawn hlah.

18.Na riantuannak ah Jesuh khrih nakin sunparnak na co deuh a si ahcun, thil dik ti loh ti nak a si.

19.Mi nih nangmah kha an in herh lo I, nangmah ah a ummi a rian na tuanpiakmi Jesuh khrih tu kha an herh i hmuh le ton an duhmi cu asi ti kha philh lo ah a tha.

20.Thangthatnak hmuh duh ruang i riantuan cu mah le mah i hrem bantuk a si ti kha philh hlah.

21.Pathian rian ahcun thiamnak le catang nakin I pekchanhnak hi a biapi deuh i hmual zong a ngei deuh ti kha philh fawn hlah.

+++