Pathian Thangthat I Lam Nihin Sullam Tampi A Ngeih

David siangpahrang Pathian nih ka thinlung bantuk a pu mi, ati mi pa hi a rah lam ve lengmang ko.

 

1. I Tangthumhnak asi: Biakinn ah a lamngammi si dingah cun Pathian hmaiah a thinlung a tangthummi si aherh, Lungpuammi le phorhlaw mi nih lam khawh si lo, A tangdormi hna nih Pathian thangthatnak hmun asi ruangah mi toidormi hna lamnak hmun asi.

2. Tha zang ngei lomi hna caah asi:  A lammi hna hi thazang dermi hna le mi nauta ka si a ti mi hna an si khun, Lam hi I piantharternak le mi nih sang ngai in ka hmu hna she ti nak a si lo, thlarau ah a zaw mi hna le a dermi hna nih tha zang an I laknak tu asi:  A Lam kho mi hna hi chambau mi ka si ti aa thei mi an si caah Pathian nih thawnnak a pek tawn hna.

3. Hneksaknak asi:  Lam hin Pathian nih a kan hneksak tawn, Koika hmun poah in Pathian thangthat khawh asi nain, Pathian nihcun minung hmaiah lamin na ka thangthat ngam lai maw? tiin akan hneksak tawn, siangpahrang Davida hmanh nih Pathian thangthat i a lâm ngam ahcun nang leh kei, zeihmanh a si lo mi nihin thangthat I lam dingah hin kan I harhtuk rih ko lai maw?

4. Lam hi Pathian thangthat asi: thangthatnak kan pek a si caah, thinlung takin an lâm ding asi, Pathian sunparnak hmai ahcun Amah a thangthatmi hna cu a cawisan in an um ve tawn, a thangthat duh lo i a lam kho ve lomi hna cu Pathian nih a zoh ziar ve ko hna.

Lam hi zumtu hna Pathian thangthatnak ah a biapi tukmi a si, Pathian alianngannak langhnak a sunparnak zumtu hna sinin a langhnak bik asi fawn, pumpak kan nun ah I fian a herh tuk rualrual in cu kan I fiannak cu amah sunparnak thangthahnak caah hmang kho hna usihlaw ti kan I forhnak si seh, Pathian nih a kan dawtnak fiangtein kan theih taktak a si ahcun Amah thangthat I lam hi a rah harsa tuk lemlo.

Biakinn chûng i lam hi lamtual tampi lakah pakhat asi, Biakinn ah kan lam bantuk hin kan innchungkhar zong hi lamnak asi , kan riantuannak le kan powcawm kawlhawlnak hmun zong hi Pathian hmaiah lamnak hmun ah canter khawh asi, Biakinn chûng I kan lam bantuk te hin kan nifatin nunnak ah kan nun ding asi, Biakinn ah kan lam I kan I lawmhnak thinlung hi kan innchungkhar zong lawmhter u sih, chungkhar ca zong ah si ko she kan riantuannak hmun zongah biakinn chung bantuk tein I lawm kho ve ko ushe, nitin kan nun ah cu lawmhnak nih cun kan nun lam hruai ko she, lam cu lunglawmhnak in a ra mi asi.

+++