Tuesday, 18 July 2017

Tuchan Fanu Le Fapa Sinah Nu Le Pa Cakuat


“Ka fa”
Ka tar tikah cun aw na ka ngaihthiam I a ruah zia na ka thiam I lungsau tein na ka zohkhenh dingah kan nawl ko, ka mit a that ti lo caan I kheng/pakaan hna ka khuai sual a si zongah, ka kut hna a hung thir I cabuai cung I meh kheng hna apingah ka thlet sual tik caanah,  aw ka bo in na ka ti lo dingin kan nawl ko.

Tar cu an thinlung a hninghno I hngakchiate bantuk an si, aw ka ro in na ka ti ah cun mah le mah I phu hrunnak in kan khat lai I kan ngaih a chia lai, ka hna nih thil a theih khawh ti lo tikah  hnachet tiah na ka ti lo ding in kan nawl ko, chimh na ka duhmi ka theih khawh colh lo tik caanah zaangfahnak tein chim than law nolh than lengmang te ko ka fa, si lo hmanh ah a tial tal in ka tial piak te ko mu.


Ka khup tha hna an thawn lotik caanah lungsau thinfual tein na ka thawh I na ka hruai ding ka ruahchan I kan nawl ko ka fa, na hngakchiat lio bawhte na si lio I kal kan cawnpiak I kan hruai bantuk te khan na ka hruai ve ding kan nawl ko ka fa, tar cu kan lung a tlau I ka chimmi ka nolh than lengmang tik zongah na ka ruahthiamnak lai kan nawl ko ka fa.

Zaangfahnak tein capo saihnak ah na hman lo ding kan nawl rih fawn, na cing ti hnga maw? Na hngakchia lio I baloon na duh I um awk tha lo in na ka hauh lio te kha…?

Ka tar hnu ahcun ka rim zong a chia cang lai, cutikah na ka ruahthiamnak lai kan nawl ka fa, tak I kholh hrimhrim ding tiah na ka fial lo dingin kan nawl fawn aruang cu tar cu kan thisa a der cang I a kik te hna kan chei ti lo, zawt awl tuk mi kan si cang caah a si, na hngakchia lio I kholh dingin kan lem tawn kha na lungah I cinken ko.

Ka phunzai I ka tlokciar a si zong ah na ka ruahthiamnak lai kan nawl ko, tar sinak nih a ken chihmi asi ko,  na tar tik ah na theih ve te ko lai, caan lawng na ngeih a si ahcun bia rak ka ruah in rak ka kawm te law minute tlawmte chung a si hmanh ah aruang cu ka fa chawnh ding ngei loin keimah te lawng ka um caah hin a si, na rian ah na buai lai ti cu ka theih kan chimh mi hi ngaih a nuammi si hmanh hlah sehlaw, zaangfahnak tein na caan tlawmte tal na ka pek khawh mi cungah ka lawm ko hnga ka fa.

Na hngakchia lio kha na thei ti maw, na aw fiang le fiang lo in bia na ka ruahmi ka rak in ngaih piak lio caan te kha, tar ka si tik I kan caan a phak ve cang hnuah cun nangmah nih lungsau thinfual tein na ka zohkhenh lai hi ka hngahhlang ve ko ka fa, ih khun ka cinter sual i ka hnomhtamh sual a si zongah na ka ruahthiamnak lai kan nawl ko.

Ka caan hmanung cu asi deng cang tuhnu tlawmpal te ah si kho mi a si lungsau te le thinfual tein na ka zohkhennak lai kan nawl duh rih ka fa, caan sau zong ka nung ti lailo I leidai ah ka kal tikah cun thihnak lungnuam tein ka pah ngamnak lai ka kut na rak ka tlaihnak lai kan nawl rih fawn, khi tikah cun ngaihchia zaangzuul in um hlah a kan sertu sin ka phak tikah khin cun sertu pa sinah thluachuah hmu dingin ka rak in chimh piak lai, zeicatiah cun hringtu na nu le na pa na dawt hna I na zohkhenhnak hna ruangah le an zawn na ruahnak hna ruangah*** an dawtu na nu le na pa. 

+++

No comments:

Post a Comment