Lungrethei, Sivangmi Hna Caah Thawnnak

Na min cu an in theih, nain na thinlung ruahnak tucu an thei lo.

 

Na mui zong an in hmuh, nain zei harsatnak dah na ton cuahmah an hmu lo.

Na nih lio muihmai cu aa dawh an ti, nain nihnak phenah a ummi ngaihchiahnak lungretheihnak tucu an hmu tilo.

Hawikawm na tlaihchan ning zong an theih, nain umhar lileng takin caan na hman tawnmi cu an in theihpi ti lo.

Aa lawm thiammi minung a si” tiin an in ti tawn, nain lawmhnak muihmai na put khawhnak ding caah na chunglei ngaihchiatnak le lungfahnak zeitindah na khuh I na thuh cu an ngal tilo.

Mi tthawng tuk hmuh in an in hmuh, nain na chambaunak le na derthawmnak na ngalhmi nih chuahtak zai anin rel hlei fawn lo.

Midang a bawmchan kho ngaimi minung ah an in ruah lioah, bawmhchanh a herh ve ti cu mi tampi nih an thei ti lo.

Na hla sak aw cu ngaih a nuam an ti lioah, na thinlung tein bia na chimmi ngaih piaktu ding an bau cang fawn.

Nunphung dawh thlau in na nung I, theihthiam awk har ngaiin nun na hman tik ah ceih le phai a tam chin lengmang, cutikah hmurka in chim phuan khawh lomi zawtnak, lungfahnak, lilen nak na tuar hi an in theihthiam piak ti lo.

An hmu hrimhrim lo, an theithiam hrimhrim lo, an ruat bal hrimhrim lo, an in khurh onh hrimhrim lo minung nihhin, nain nang nih cun theihthiam I domhtlaih na herh lio caan ah ka tha ko, ka dam ko tiah velhle na chim cuahmah lio zongah, na tha lo, na zaw na damlo hi tiin na lu an muai piaktu le an thuammuaitu ding kha na nun nih a hlammi le na herhmi cu a si ko.

Si na thachia hrimhrim hlah  pumpak kan harsatnak hi minung nih an kan theihthiam piak kho dih lo, an kan khurh onh in an kan zohkhenh dih kho tawn hna lo, minung nih cun an theih hmanh ah thinlung takin a kan tuarpi tu an um va ko lai, culakah a lung a awi i a ra a rak I lawmmi zong an um ko lai, minung cu a tlamtling lomi a chambau mi kan si, cucaah zeizong ti kho Bawipa Jesuh sintu ah kan nun hi up ko hna usih, kan thilrit, harsatnak zong amah sinah phuang ko hna usih, minung kan nun nih a hlam mi le lungawi nak taktak cu Bawi Jesuh khrih lawnglawng hi a si.

+++