Na Pi Le Na Pu, Na Nu Le Na Pa, Kha Tar Tlokchiar Na Ti Ko Hna Maw?

Hngakchia kan si lio ahcun, a kan hringtu kan nu le kan pa hna hi Pathian tlukah kan rak ruah hna, kan rak I bochan hna I thil ti kho ah kan rak ruah hna, ( a rak si taktak ve ko )

 

Tleirawl, mino kan si hnu ahcun mi phunzai le minengthla,le mi hnahnawk ah kan nu le kan pa hna cu kan hmuh hoi hna, ( nain mah khakha kan caah a rak tha tukmi a si )

Nupi/pasal kan van ngei le te he fa he kan van um hnu ahcun, kan nu le kan pa hna nih an rak temtuarmi le an retheihnak,an tonmi thil hna cu kan van hmuh piak thiam ve hna I an sunglawi zia kan van theihthiam piak ve hna, cutikah nu le pa nih an kan dawtnak kan theihmi cu cham dingah kan lungah a um I kan van pemh ve I chamding kan van I timh tuah ve tik ahcun nu le pa cheukhat cu thlanmual hna ah an kan liam tak cang, ( I ngaihchihnak nih san a tlai tilo )

Tefa he nu le pa dirhmun I kan van um tikah, nu le pa putar, pitar hna sinin ruahnak cheutu ding le petu ding a biapi zia le a herh zia kan I fiang chinchin, cucaah putar, pitar tuakpar cangmi hna nih an kan nunpi rihmi hi kan I lawmh ding a si, kan dawt ding hna zong an si.

Note// tuchan mino hna hi kan chan vawlei thancho ning a ran rualrual in, hlan lio kan nunphung dawh nu le pa upatnak, tihzahnak mahnak upa, pitar putar upat, hmaizahnak kan tlakcham tukmi hi a poimi a si, Pathian bia zong nih a kan cawnpiakmi cu mah nak upa, pitar putar, nu le pa upat tihzah cu a kan fialmi a si, atu ah hngakchia mino si rih ko hmanh usihlaw, hnu ahcun upa, te he fa he nu le pa dirhmun, pitar upar dirhmun kan si caan a um ve te lai, kan no lio teah mah nak upa, pitar putar, nu le pa kan tihzah thiam hna a si ahcun, kanmah zong nu le pa, pitar putar kan si ve tikah kan fa le nih an kan upat, tihzah ve te lai ti zong hi philh lo ding a si.

+++