Mifim Le Mihrut

Mifim nih amah a sertu a ngalh cucaah amah a sertu cu a thangthat, sunparnak a pek tawn.

 

Mihrut nih amah sertu a ngalh lo caah sungparnak pek le thangthat awk zong a ngal lo.

Mifim nih a nu le pa tihzahnak caan a theih I a upat tawn hna an nawl a ngaih hna.

Mihrut nih nu le pa tihzahnak caan a theih lo pinah, amah duhning le nuamh ning paohin a nung I a hnu ah a nu le pa chungkhar ningzah tertu ah ai cang tawn.

Mifim nih a hmun le caan zoh thiam in bia a chim I, I sumkhawhnak zong a ngei tawn.

Mihrut cu I sumkhawhnak hrimhrim a ngei lo I a pah thluahmah caah a mual a pho tawn.

Mihrut nih a herh lole amah nuamhnak ding men lawngah tangka a hman tawn a hnu ah a ngeihchih.

Mifim nih a duhmi nakin a herhmi thil a theih deuh I a herhmi lawng ah a tangka a hman ve tawn.

Mihrut nih rit-hai nak si hmangin le taksa duhnak in nuamhnak a kawl tawn, a hnu ah lungfahnak le I ngaihchihnak in a dong tawn.

Mifim nih titsa duhnak le rit-si in nuamhnak kawllo in a thih tik I thlanmual pinlei zungzal a hmunmi nuamhnak, lawmhnak tu a kawl tawn I cu nihcun hna ngamnak lawmhnak a pek ve tawn.

Mihrut nih cikkhat ca lawmhnak lawng a kawl I a tuah tawn, nun ca te lawng, minung kan nunchung caan te hi cikkhat te lawng a si.

Mifim cu khua saupi a ruat kho I, nunchung caan te lawng si loin, zungzal lawmhnak, nuamhnak tu a kawl ve tawn.

“cuticun hi kan chimhmi hna a thei I azulmi cu lungpi cungah inn asa mi mifim pa bantuk an si, ruah asur I ti a lian , thlichia tilet a tho I  a a vun den tikah lungpi cung I sakmi a si caah a hrawk kho lo” ( Matthai 7:24-25 )

+++