Zeintindah Mi Puitling Kan Si Khawh Lai?

1.Vawlei hi nuamhnak ram si loin, harsatnak, rehtheihnak, buainak ram a si kha thei peng, a nuamhnak lawng in hman I tim hlah, dawt cukmak mi hna hmanh nih fahnak I pek nak ram a si, cucaah Job nih zei a ti buainak le harsatnak hna hi van zong in a rak thla lo I, vawlei in arak khomi zong asi lo, minung tu hi buainak le harsatnak tong dingin vawlei ah a rak I semmi kan si a ti, mi puitling si dingah cun cu harsatnak cu zam tak loin kan hmaichon ngam I kan pah ngam a haumi asi, cu harsatnak hnu ah nuamhnak hna cu a um, cucaah na hmaiah buainak, harsatnak a chuah tikah zam tak men lole, hrial tak men lo in minung nih kan pah ngam hi kan nunnak puiltingnak ding ah a herh taktak mi a si.

2.Chungkhar,sahlawh, rualchan, u le nau daithlanh hlei loin venhim pahbu in thil dang ti mah hi a biapi mi a si, micheu khat cu thil pakhatkhat tuah tik le thil pakhatkhat a can tikah, chungkhar sahlawh, u le nau zong a thei ti lomi kan um tawn, hihi mi puitling hna dirhmun a si lo.

3.Micheu khat nih  mi puitling sinak hi kumkhua hna in an tah theo tawn, mi tampi nih kan I palhmi cu mah hi a si mi puitling sinak hi kum le khua ah a rak si naisai lo, mi puitling tahnak cu mah tu hi a si, 1, a rian ah, 2.a biachim holh relah, 3. A lungput ah, a riantuannak ah soi awk um lo tein felfai tein a tlamtlinh kho mi hna hi mi puitling an si,cun biachim holhrel ah aa ralring I aa fimkaanmi hna, a thil tinak ah ka puitlinh hrimhrim lai ti lungput a ngei kho mi, mah hna hi mi puitling sinak  dingah kan theih a herhmi hna cu an si.

4.Midang kutke rinh bak loin, mah kutke tein dir khawh, I todelh khawh, thutdir khawh hi mi puitling sinak a si. Mah hna hi taksa leiin mi puitling sinak langhtermi si sehlaw, zumhnak ah mi puitling si hi a herh chinchin fawn, zumhnak ah puitlingmi hna thil an hmuh ning a tanglei ah zoh than.

1.Harsatnak hna hi Pathian kut chak a langhnak le a sunparnak kan hmuhkhawhnak hlei a si.

2.Harsatnak hi Bawipa lei kar kan hlannak ah intuar khawhnak thazaang a petu taktak a rak si.

3.Harsatnak kan ton I kan tuar khawhmi zah paoh in Pathian nih a kan hman theo tawn,cucaah zumtu caah harsatnak hi harnak si loin Pathian nih a kan hmannak ding hmanrua a rak si.

4.Harsatnak hna hi harsatnak in kan hmuhmi hi minunglei hmuh ning a si, zumtu hna nih kan rawl thaw bik bantuk ca tiangin kan hman khawhnak ding caah, kan tem I kan tuar kan in hna hi Bawipa nih a kan senh mi a si ve ko tihi zumhnak ah a puitlingmi hna nunning cu asi.

Adonghnak : Zumhnak ah a puitling cangmi hna nih harsatnak hi harsatnak ah ruat loin, thluachuahnak ah an ruah.

+++