Politics Kan Timi Hi

A ngalmi kan pupa hna tampi lakah, ca ka relmi chungin ka lung ah a tap mi tlawmpal te ka van langhter ve, ka palhmi zong tampi a um ko lai ngaihthiam nawlbu he.

 

Politics timi hi laimi zong nih kanmah holh bantukin kan hman I kan chim lengmang, asullam le a umning belte I fiang ngai a hau mi asi, mifim thiamsangmi hna nih asullam an fainter ning le an langhter ning belte ai dang cio, politics ti biafang hi Greek holh (polis)timi in lakmi asi, asullam cu hlanchan Greek ram an I uk nak .Greek City,State ti a chim duhnak asi ti asi.Greek City le State ahcun politics le biaknak I then lo tein ,an kal ti ,ram , le khua tlang an nun an khuasak nakah lai an relnak ah, an cawlcanghnak ah an khuakhannak ah politics tangah an um I politics nih a huap dih ti khi asi.

 Politics timi hi kan theih fian ning a khah lo bantukin, kan hmuh ning le kan kalpi ning zong aa dang cio, micheu khat caah politics cu thutdanh sang, bawi I cuh nak men ah le, mah caah thatnak lawngah aa lakmi, cun mi hlen nak men ah le, mah hlawk nak ding ca lawng ah aruatmi an um, mah sahlawh, chungkhat cingla ca hrangah a thahnemmi hmun le hma ca lawngah a ruatmi um asi cucaah politics certual/tili chungah I peih le um ve I tel ve hi biaknak, khrihfabu hruaitu hna le Pathian mifa hna caah a thiang lomi bantukah le I tel ve lo ding bantuk ah aruat sualmi tampi um asi, zumtu hna nih mah bantuk ruahnak mit in politics timi hi kan conh ding le kan zoh ding cu a rah si lemlo.

Kan ruahdingmi cu mipi, zatlang, zapi, zaraan ramkhat ah khua asa ti mi vialte I rualraan tein,aa tluk cio tein kan nun khawh dih cio nak hnga le khua kan sak ti khawh dih cio nak hnga, a dikmi uknak le lairelnak a um a hau, Minung kan si bantukin a buin a ummi kan si cucaah kan khuasak ningding le, kan thutto cio dingning, zalawng te le duhdim tein khuasak ti khawhnak ding, tuaktaan le tawlrel, khuakhan khi politics timi cu asi, innchungkhar kong I hruainak ah siseh, nifatin kan nun cannak dingah, fim cawnnak, sianginn caah siseh, nuncan khuasaknak tangka kawlnak ah, eidin pawcawm kawlhawlnak, biaknak lei tiang etc, a huap dih cucaah minung asi mi poah nih kan duh maw duh lo ah, politics chungin kan luat kho loh ti khawh a si, cu tluk kau in politics nih hin a huap khawh, mah caah cun minung khuatlang in ram in kan thancho khawhnak ding caah siseh, kan umnak kan khuasak nakah him te le, hna ngam tein a ummi kan si I zalawng tein khua a sa mi kan si khawhnak ding asi caah, politics timi ngalhfian hi a biapi ngaimi cu a rak si, cu bantukin minung dai te le hna ngam tein kan khuasak khawhnak ding caah cun mi dingfel le, mi dik, mifel mitha hna nih an kan uk le an kan hruai cu a herh mi asi, cu bantukin mi dingfel le mi dik hna nih uknak thutdanh an co khawhnak dingah cun mipi le a mi kip nih tuanvo kan ngei, mah bantuk mit in zumtu hna nih politics timi hi kan zoh ding le kan cawnh ding a si, kan pawm ding zong a si fawn.

Mah bantukin uknak, nawlngaihnak, lairel nak mi pakhat nih a co tikah mah cu Pathian nih uktu caah kan cungah a chiahmi asi ti hi zumtu hna kan Bible le biaknak zong nih a cohlan mi asi, uktu hna hi Pathian nih uktu ah a ser hna ruangah an palh kholo ti le an sual kho lo ti zong ruah lo ding asi, a palh kho an si a sual kho an si ve thotho ko, nain zumtu hna caah cun Pathian nih kan caah uktu ah a chiah ti kan pawm khawh hi a biapi mi asi, zeicatiah zeizong vialte hrampi cu Pathian a si I politics a hrampi zong Pathian a si kan ti khawh, adonghnak ding zong Pathian kut chungah a um Pathian lawnglawng a si kan ti khawh, politics ruangah zalawnnak a um rualrual in, politics zalawnnak a kawinak lei in a hmangmi le a si loning in ahmangmi cu Pathian cungah a sual cang kan ti khawh fawn tizong kan theih ding asi, mah caah cun politics timi nih a sawh duhmi cu.mi vialte I rualraan tein khuasak ti khawh le duhdim zalawng tein um khawhnak uk nak lairelnak, nawlngeih nak hi politics ti a sullam cu asi.

+++