Khi Ni Ah Cun

Zeitik ni ah maw khan a nih he khan kan I nuam in kan ni ti tawn, sihmanhsehlaw philh khawh ti lo ding hma a ka chiah tak I a nih cu liam zai a rel ve cang.

 

Hi vawlei ah I hmu than ti lo dingin a taksa cu thlan leiah kan va thlah i, si e taksa in a nung rihmi kan si, cu kan taksa cu chikkhat teah thlarau pum in thlen a si tikah cun, lungfah, nganfah um ti lo nak vanram lei cu kan panh cang lai I cuka cun misual a kan khamhtu Bawi Jesuh  nih kan caah hmun a remh mi ah cun len zai kan rel ve cang hna lai.

Si hrim ko, keimah hrimhrim zong hi ka chuahni nakin ka thihni cu cinken theih pengin a um ve cang lai, a ruang cu ka thih tik ahcun an ka vuinakah thlanlung an phun lai caah mah cu a um peng ding a si, hawi le kawm he aleng ti tawn I lileng ballo thlakaam ballo kha khi ni ah cun lileng thlakaam in keimah te lawng in hi vawlei hi chuah tak zai ka rel ve cang lai.

Khi tikah ka min au in na ka hlam zong ah, kan let kho ti lailo I kan chawn kho fawn ti lailo, na auhnak aw hna cu ka hna ah an lut kho ti lai lo I ka theih khawhnak zong a um ti lai lo khi ni ah cun.

Na mitthli a luan lai I cu na mithli hna zong nih cun a ka tlai kho in a ka kham kho ti lailo, pangpar na vun put lai I kei cu ka mit zong ka au kho ti lai lo I ka zoh in ka hmu kho ti lai lo, na pangpar cu a va dawh ve an ti piak tawntu kha khi ni ah cun kan conglawmh in na pangpar cu kan lawmh piak kho ti lai lo.

Cutikah tuni le tucaan hna hi tuanbia ah an cang cang lai, a rak ka thei peng tawnmi hna zong nih duhsah duhsah in kei cu an ka philh cang lai I, hi vawlei min cazin ah ka um ve lo hnu ah cun ka min auhnak thawng  zong kha duhsah tete in a dai thluahmah ve cang lai.

Ka nun lio I ka rak thlah tawnmi hna hnu cu kei zong nih ka zul ve cang hna lai I leidip in sermi a rawkral kho mi kan pum lo leidip ah a kar than ve lai I, rawlral kho ti loin sermi van pum cu kan Bawipa Jesuh khrih thawngin kan I hruk ve cang lai.

Khi Ni  ah cun

+++